ಗ್ರಂಥರತ್ನಮಾಲಾ

ಶ್ರೀ ಪದ್ಮಮಹಾಪುರಾಣಂ – ಉತ್ತರಖಂಡ – ಐದನೆಯ ಭಾಗ – (೧೮೯ – ೨೧೮ ಅಧ್ಯಾಯಗಳು)

ಆರಂಭಿಕ ಪುಟ ಅನುವಾದಕರು: ಶ್ರೀ ಬೇಲದಕೆರೆ ಸೂರ್ಯನಾರಾಯಣ ಶಾಸ್ತ್ರಿ

ವಿಷಯಾನುಕ್ರಮಣಿಕೆ

ಮುನ್ನುಡಿ
ನೂರ ಎಂಭತ್ತೊಂಭತ್ತನೆಯ ಅಧ್ಯಾಯವು
- ಭಾಗವತದ ಗುಣಕಥನ ಮಾಡುವಾಗ ಅದರ ಹಿಂದಿನ ಕಥೆಯ ವರ್ಣನೆ. ಅದರಲ್ಲಿ ಪ್ರಸಂಗದಿಂದ ಕಲಿಯ ವರ್ಣನವು. ಕಲಿಯುಗದಲ್ಲಿ ಮುಂದಾಗುವ ಕಥೆಗಳ ವರ್ಣನೆ. ಭಕ್ತಿ, ಜ್ಞಾನ, ವೈರಾಗ್ಯವನ್ನು ನಾರದನು ನೋಡುವುದು. ಭಕ್ತಿಯು ಆ ನಾರದನೊಡನೆ ತನಗೆ ಯೌವ್ವನವು ಬಂದಿರುವುದನ್ನೂ ತನ್ನ ಮಕ್ಕಳಾದ ಜ್ಞಾನ, ವೈರಾಗ್ರರಿಗೆ ಮುಪ್ಪು ಬಂದಂತಾಗಿ ಬಡಕಲಾಗಿರುವುದನ್ನೂ ಪ್ರಶ್ನಿಸಿ ಮತ್ತು ಅದನ್ನು ನಿವಾರಣೆ ಮಾಡುವ ಬಗೆಯನ್ನೂ ಪ್ರಶ್ನಿಸುವುದು.
ನೂರ ತೊಂಭತ್ತನೆಯ ಅಧ್ಯಾಯವು
- ಭಕ್ತಿಯನ್ನು ಕುರಿತು ನಾರದನು ಆ ಭಕ್ತಿಯ ಮಹಿಮೆಯನ್ನು ಜ್ಞಾಪಿಸುವುದು. ಜ್ಞಾನ ವೈರಾಗ್ಯರನ್ನು ನಾರದನು ಕೈಯ್ಯಿಂದ ಮುಟ್ಟಿ ಅಲ್ಲಾಡಿಸಿದರೂ ಅವರಿಗೆ ಎಚ್ಚರವಾಗದಿದ್ದುದನ್ನು ನೋಡಿ ಅವರಿಗೆ ಎಚ್ಚರವಾಗಲು ಏನು ಮಾಡಬೇಕೆಂದು ಯೋಚಿಸುತ್ತಿರುವಾಗ ಆಕಾಶವಾಣಿಯು ಆ ಉಪಾಯವನ್ನು ಹೇಳುವುದು. ಆಗ ನಾರದನು ಎಲ್ಲ ಋಷಿಗಳ ಬಳಿಗೂ ಹೋಗುವುದು. ಅವರುಗಳಿಂದ ಆಕಾಶವಾಣಿಯು ಹೇಳಿದ ಆ ಉಪಾಯವು ತಿಳಿಯದಿರಲು ಸನತ್ಕುಮಾರರ ಬಳಿಗೆ ಹೋಗುವುದು. ಅವರು ನಾರದನಿಗೆ ಭಾಗವತ ಕಥಾಶ್ರವಣ ಮಾಡಬೇಕೆಂಬ ಉಪಾಯವನ್ನು ಹೇಳುವುದು.
ನೂರ ತೊಭತ್ತೊಂದನೆಯ ಅಧ್ಯಾಅಯವು
- ಗಂಗಾದ್ವಾರದ ಹತ್ತಿರವಿರುವ ಕಾಮೋದ ಪುರದಲ್ಲಿ ನಾರದನು ಭಾಗವತದ ಸಪ್ತಾಹವನ್ನು ಮಾಡಿಸಿದುದರ ವರ್ಣನೆ. ಆ ಭಾಗವತ ಸಪ್ತಾಹ ವಿಧಾನವು ನಡೆಯುತ್ತಿರಲು ಆ ಜ್ಞಾನ, ವೈರಾಗ್ಯರಿಗೆ ತಾರುಣ್ಯವು ಬರುವುದು. ಭಕ್ತಿಯು ಹರಿಸೇವಕರ ಮನಸ್ಸಿನಲ್ಲಿ ನೆಲಸುವುದು.
ನೂರ ತೊಂಭತ್ತೆರಡನೆಯ ಅಧ್ಯಾಯವು
- ಸಪ್ತಾಹ ಮಹಿಮೆಯನ್ನು ವರ್ಣಿಸುವಲ್ಲಿ ಗೋಕರ್ಣನೆಂಬುವನ ಕಥೆಯ ವಿವರಣೆ. ಗೋಕರ್ಣನ ಉಪದೇಶವನ್ನು ಕೇಳಿ ಅವನ ತಂದೆಯು ಮೋಕ್ಷವನ್ನು ಹೊಂದಿದುದು.
ನೂರ ತೊಂಭತ್ತಮೂರನೆಯ ಅಧ್ಯಾಯವು
- ಬಹು ದುಷ್ಟನಾದ ಗೋಕರ್ಣನ ತಮ್ಮನ ಮೇಲೆ ಅವನು ಇಟ್ಟುಕೊಂಡಿದ್ದ ಜಾರೆಯರು ಬೆಂಕಿಯ ಕೆಂಡವನ್ನು ಹಾಕಿದುದರಿಂದ ದುರ್ಮರಣವುಂಟಾಗಿ ಪ್ರೇತವಾಗುವುದು. ತನ್ನ ತಮ್ಮನಿಗೆ ಪ್ರೇತದ ರೂಪವು ಹೋಗಲು ಗೋಕರ್ಣನು ಸೂರ್ಯನನ್ನೂ ಅಲ್ಲಾಡದಂತೆ ಮಾಡುವುದು. ಸೂರ್ಯನ ಉಪದೇಶದಂತೆ ಗೋಕರ್ಣನು ಭಾಗವತ ಸಪ್ತಾಹವನ್ನು ಮಾಡಿ ತನ್ನ ತಮ್ಮನಿಗೆ ಪ್ರೇತಭಾವವನ್ನು ಹೋಗಲಾಡಿಸಿ ಮುಕ್ತಿಯನ್ನು ಹೊಂದಿಸಿದುದು.
ನೂರ ತೊಂಭತ್ತನಾಲ್ಕನೆಯ ಅಧ್ಯಾಯವು
- ಭಾಗವತ ಸಪ್ತಾಹವನ್ನು ಮಾಡುವ ಬಗೆ. ಭಾಗವತದ ಪ್ರಶಂಸೆಯು.
।। ಭಾಗವತ ಮಹಿಮೆಯು ಮುಗಿದುದು
ನೂರ ತೊಂಭತ್ತೈದನೆಯ ಅಧ್ಯಾಯವು
- ಕಾಳಿಂದೀ ನದಿಯ ದಡದಲ್ಲಿರುವ ಖಾಂಡವವನದಲ್ಲಿ ಇಂದ್ರನು ಯಾಗಮಾಡಿದುದರ ವರ್ಣನೆ.
ನೂರ ತೊಂಭತ್ತಾರನೆಯ ಅಧ್ಯಾಯವು
- ಯಾಗದಿಂದ ಪ್ರಸನ್ನನಾದ ಭಗವಂತನು ಇಂದ್ರನಿಗೆ ವರವನ್ನು ಕೊಡುವುದು. ಆ ಸ್ವಾಮಿಯ ಅಪ್ಪಣೆಯಂತೆ ಅಲ್ಲಿ ಬ್ರಹ್ಮನೇ ಮುಂತಾದ ಎಲ್ಲಾ ದೇವತೆಗಳೂ ಅವರವರದೊಂದೊಂದು ತೀರ್ಥಕ್ಷೇತ್ರಗಳನ್ನೂ ನಿರ್ಮಿಸಿದುದರ ವರ್ಣನೆಯು. ಶಿವಶರ್ಮನ ಮಗನಾಗಿ ಇಂದ್ರನು ಅವತರಿಸಿದುದರ ವರ್ಣನೆ. ಶಿವಶರ್ಮನು ತನ್ನ ಮಗನಾದ ವಿಷ್ಣುಶರ್ಮನೊಡನೆ ಕಾಳಿಂದೀ ತೀರದಲ್ಲಿರುವ ಇಂದ್ರಪ್ರಸ್ಥಕ್ಕೆ ಹೋಗುವುದು ಅಲ್ಲಿ ವಿಷ್ಣುಶರ್ಮನಿಗೆ ಹಿಂದಿನ ಜನ್ಮಗಳ ಜ್ಞಾಪಕ ಬರುವಿಕೆಯು. ಆಗ ವಿಷ್ಣುಶರ್ಮನು ತಂದೆಯಾದ ಶಿವಶರ್ಮನಿಗೆ ತನ್ನ ಪೂರ್ವಜನ್ಮದ ಕಥೆಯನ್ನು ಹೇಳುವುದು. ಬೇಡ ಸಿಂಹರಿಗೆ ಮುಕ್ತಿ ಬರುವುದು.
ನೂರ ತೊಂಭತ್ತೇಳನೆಯ ಅಧ್ಯಾಯವು
- ನಿಗಮೋದ್ಭೋದಕ ತೀರ್ಥದಲ್ಲಿ ಸ್ನಾನ ಮಾಡುವುದರಿಂದ ಶಿವಶರ್ಮನಿಗೆ ತನ್ನ ಹಿಂದಿನ ಜನ್ಮಗಳ ಜ್ಞಾನ ಬರುವುದು. ಅದನ್ನು ತನ್ನ ಮಗನಾದ ವಿಷ್ಣುಶರ್ಮನಿಗೆ ಹೇಳುವುದು. ಆಗ ಪೂರ್ವಜನ್ಮದ ತಂದೆಯಾದ ಶರಭನೆಂಬ ವೈಶ್ಯನ ಕಥೆಯ ವರ್ಣನೆಯು. ಮಕ್ಕಳಿಲ್ಲದ ಶರಭನ ಮನೆಗೆ ದೇವಲನೆಂಬ ಋಷಿಯು ಬರುವುದು. ದೇವಲನು ಶರಭನಿಗೆ ಮಕ್ಕಳಾಗದುದರ ಕಾರಣವನ್ನು ತಿಳಿಸುವುದು. ಮತ್ತು ಮಕ್ಕಳಾಗುವುದರ ಉಪಾಯವನ್ನೂ ಹೇಳುವುದು.
ನೂರ ತೊಂಭತ್ತೆಂಟನೆಯ ಅಧ್ಯಾಯವು
- ದೇವಲನು ಶರಭನಿಗೆ ದಿಲೀಪನ ಕಥೆಯನ್ನು ಹೇಳುವುದು. ಆಗ ದಿಲೀಪನು ಗುರುವಾದ ವಸಿಷ್ಠರ ಆಶ್ರಮಕ್ಕೆ ಹೋಗುವುದು.
ನೂರ ತೊಂಭತ್ತೊಂಬತ್ತನೆಯ ಅಧ್ಯಾಯವು
- ರಘುವಂಶದಲ್ಲಿ ಎರಡನೆಯ ಸರ್ಗದಲ್ಲಿ ಹೇಳಿರುವ ಕಥೆಯ ವರ್ಣನೆ. ಅಲ್ಲಿ ದಿಲೀಪನಿಗೆ ಗೋವು ಅನುಗ್ರಹಿಸಿದುದರ ವರ್ಣನೆ.
ಇನ್ನೂರನೆಯ ಅಧ್ಯಾಯವು
- ಶರಭನು ಆ ದೇವಲನ ಅಪ್ಪಣೆಯ ಮೇರೆಗೆ ಗೌರಿಯನ್ನು ಆರಾಧಿಸುವುದು. ಗೌರಿಯ ಮಾತಿನಂತೆ ಶರಭನು ಇಂದ್ರಪ್ರಸ್ಥಕ್ಕೆ ಹೋಗಿ ಅಲ್ಲಿನ ತೀರ್ಥಸ್ನಾನದಿಂದ ಮಗನನ್ನು ಹೊಂದಿದುದು. ಮಗನು ಕಾಲಕ್ರಮದಲ್ಲಿ ದೊಡ್ಡವನಾಗಿ ಸಂಸಾರಭಾರವನ್ನು ವಹಿಸಿಕೊಳ್ಳಬಲ್ಲನೆಂಬುದನ್ನೂ ತಿಳಿದು ಎಲ್ಲಾ ವಿಷಯದಲ್ಲಿಯೂ ವೈರಾಗ್ಯವನ್ನು ಹೊಂದಿ ಶರಭನು ಇಂದ್ರಪ್ರಸ್ಥಕ್ಕೆ ಹೋಗುವುದು. ಶರಭನಿಗೆ ಅಲ್ಲಿ ಜ್ವರ ಬರಲು ಒಬ್ಬ ಪ್ರಯಾಣಿಕನು ಅವನನ್ನು ಡೋಲಿಯಲ್ಲಿ ಕೂರಿಸಿಕೊಂಡು ಅವನ ಊರಿಗೆ ಕರೆದುಕೊಂಡು ಹೋಗುವುದು. ಹೋಗುತ್ತಿರುವಾಗ ಮದ್ಯದಾರಿಯಲ್ಲಿ ಒಬ್ಬ ರಾಕ್ಷಸನು ಸಿಕ್ಕುವುದು. ಆ ಶರಭನೂ ಪ್ರಯಾಣಿಕನೂ ಡೋಲಿಯನ್ನು ಹೊರುವವರೂ ಅಲ್ಲಿ ತಂಗಿ ಆ ಇಂದ್ರಪ್ರಸ್ಥತೀರ್ಥದ ನೀರನ್ನು ಕುಡಿದು ವಿಶ್ರಾಂತಿಯನ್ನು ತೆಗೆದುಕೊಳ್ಳುತ್ತಿರುವಾಗ ಆ ರಾಕ್ಷಸನು ಪ್ರಯಾಣಿಕನನ್ನೂ ಡೋಲಿಯನ್ನು ಹೊರುವ ಜನರನ್ನೂ ತಿಂದುಬಿಡುವುದು. ಅನಂತರ ಶರಭನ ಮೇಲೆ ಉದಾಸೀನ ಮಾಡಿ ಅವನ ಬಳಿಯಿರುವ ನೀರನ್ನು ಆ ರಾಕ್ಷಸನು ಕುಡಿದಮೇಲೆ ಅವನಿಗೆ ತನ್ನ ಪೂರ್ವಜನ್ಮದ ಸ್ಮರಣಿಯು ಬರುವುದು. ಶರಭ ರಾಕ್ಷಸರ ಪ್ರಶ್ನೋತ್ತರಗಳು. ಆ ಪ್ರಯಾಣಿಕನೂ ಡೋಲಿಯನ್ನು ಹೊರುವವರೂ ಅಪಮೃತ್ಯುವಿನಿಂದ ಸತ್ತರೂ ಆ ಇಂದ್ರಪ್ರಸ್ಥದ ತೀರ್ಥವನ್ನು ಕುಡಿದುದರಿಂದ ಅವರಿಗೆ ಕುಬೇರ ಲೋಕವು ಸಿಕ್ಕುವುದು. ರಾಕ್ಷಸನೂ ಶರಭನೂ ಮತ್ತೆ ಇಂದ್ರಪ್ರಸ್ಥಕ್ಕೆ ಬರುವುದು. ಅಲ್ಲಿಗೆ ತಂದೆಯನ್ನು ನೋಡಲು ಶರಭನ ಮಗನು ಬರುವುದು. ಶರಭನು ಅಲ್ಲಿ ಸಾಯುವುದರಿಂದ ವೈಕುಂಠ ಪ್ರಾಪ್ತಿಯಾಗುವುದು.
ಇನ್ನೂರ ಒಂದನೆಯ ಅಧ್ಯಾಯವು
- ಇಂದ್ರಪ್ರಸ್ಥ ತೀರ್ಥದಲ್ಲಿ ರಾಕ್ಷಸನಿಗೆ ಮುಕ್ತಿಯು ಸಿಕ್ಕುವುದು, ಇಂದ್ರಪ್ರಸ್ಥದಲ್ಲಿ ಸತ್ತರೂ ಕೂಡ ಶಿವಶರ್ಮನು ಪುನರ್ಜನ್ಮವನ್ನು ಎತ್ತಲು ಕಾರಣ. ಇಂದ್ರಪ್ರಸ್ಥದಲ್ಲಿದ್ದ ಶಿವಶರ್ಮ ವಿಷ್ಣುಶರ್ಮರಿಬ್ಬರಿಗೂ ವೈಕುಂಠವು ಸಿಕ್ಕುವುದು.
ಇನ್ನೂರ ಎರಡನೆಯ ಅಧ್ಯಾಯವು
- ಇಂದ್ರಪ್ರಸ್ಥದಲ್ಲಿರುವ ದ್ವಾರಕೆಯ ಮಹಿಮೆಯ ವರ್ಣನೆಯು. ಕಾಂಪಿಲ್ಯ ನಗರದಲ್ಲಿದ್ದ ಪುಷ್ಪೇಷುವೆಂಬ ಬ್ರಾಹ್ಮಣನ ರೂಪಗಾನವೇ ಮುಂತಾದ ಅನೇಕ ಗುಣಗಳಿಂದ ಅವನಲ್ಲಿ ಅನುರಾಗ ಹೊಂದಿದ ಆ ಊರಿನ ಹೆಂಗಸರು ಆ ಬ್ರಾಹ್ಮಣನ ಶಾಪದಿಂದ ಸತ್ತಮೇಲೆ ರಾಕ್ಷಸಿಯರಾಗಿ ಹುಟ್ಟುವಿಕೆ. ಅವರೆಲ್ಲರನ್ನೂ ಹನುಮಂತನು ಕೊಂದಮೇಲೆ ಅವರು ಮತ್ತೆ ರಾಕ್ಷಸಿಯರಾಗಿ ಹುಟ್ಟುವುದು. ರೋಗ ಸೋಮಾರಿತನವೇ ಮುಂತಾದ ತೊಂದರೆಗಳಿಂದ ಕೂಡಿದವನಾದರೂ ಆ ಗಂಡನನ್ನು ಬಿಟ್ಟರೆ ಹೆಂಗಸರಿಗೆ ನರಕ ಬರುವಿಕೆಯ ವರ್ಣನೆ.
ಇನ್ನೂರ ಮೂರನೆಯ ಅಧ್ಯಾಯವು
- ವಿಮಲನ ಕಥೆ. ಮಿತ್ರನ ಲಕ್ಷಣ.
ಇನ್ನೂರ ನಾಲ್ಕನೆಯ ಅಧ್ಯಾಯವು
- ಮರುದೇಶದಲ್ಲಿ ರಾಕ್ಷಸಿಯರಾಗಿ ಹುಟ್ಟಿದ್ದ ಆ ಸ್ತ್ರೀಯರಿಗೆ ಯಾವನೋ ಒಬ್ಬ ಬ್ರಾಹ್ಮಣನಿಂದ ದ್ವಾರಕೆಯ ನೀರು ಸಿಕ್ಕಲು ಉತ್ತಮಲೋಕ ಸಿಕ್ಕಿದುದು.
ಇನ್ನೂರ ಐದನೆಯ ಅಧ್ಯಾಯವು
- ಇಂದ್ರಪ್ರಸ್ಥದಲ್ಲಿರುವ ಕೋಸಲೆಯ ಮಹಿಮೆಯಲ್ಲಿ ಮುಕುಂದ ಎಂಬ ಬ್ರಾಹ್ಮಣನ ಕಥೆಯ ವರ್ಣನೆ. ಅಲ್ಲಿ ಅಪಮೃತ್ಯುವಿಗೆ ತುತ್ತಾಗಿದ್ದ ಮುಕುಂದನ ತಾಯಿಗೆ ವೇದಾಯನನು ಮಾಡಿದ ಧರ್ಮೋಪದೇಶವು.
ಇನ್ನೂರ ಆರನೆಯ ಅಧ್ಯಾಯವು
- ಕೋಸಲೆಯ ನೀರಿನಲ್ಲಿ ಮುಕುಂದನ ಮೂಳೆಯು ಬಿದ್ದ ಕೂಡಲೆ ಅವನಿಗೆ ಉತ್ತಮ ದೇಹವು ಸಿಕ್ಕಿದುದು. ಮುಕುಂದ ವೇದಾಯನರ ಪ್ರಶ್ನೋತ್ತರಗಳಲ್ಲಿ ಮುಕುಂದನು ತಾನು ಅನುಭವಿಸಿದ ಯಮ ಯಾತನೆಯನ್ನು ವರ್ಣಿಸುವುದು. ಮುಕುಂದನು ಸ್ವರ್ಗವನ್ನು ಹೊಂದಿದುದು.
ಇನ್ನೂರ ಏಳನೆಯ ಅಧ್ಯಾಯವು
- ಚಂಡಕನೆಂಬ ನಾಪಿತನು ಬ್ರಾಹ್ಮಣನನ್ನು ಕೊಂದುದರಿಂದ ಅವನಿಗೆ ಸರ್ಪದ ಜನ್ಮವು ಬಂದಿರುವುದು. ತಾಯಿತಂದೆಗಳ ಅಸ್ಥಿಯನ್ನು ತೆಗೆದುಕೊಂಡು ಹೋಗುತ್ತಿದ್ದ ಒಬ್ಬ ಬ್ರಾಹ್ಮಣನ ಬುಟ್ಟಿಗೆ ಈ ಸರ್ಪವು ಸೇರಿಕೊಳ್ಳುವಿಕೆ. ಆ ಬ್ರಾಹ್ಮಣನ ಆ ಬುಟ್ಟಿಯ ಜೊತೆಯಲ್ಲಿ ಆ ಹಾವು ಕೋಸಲಕ್ಕೆ ಹೋಗುವಿಕೆ. ಕೋಸಲೆಯಲ್ಲಿ ಆ ಹಾವು ಸತ್ತುದರಿಂದ ಅದಕ್ಕೆ ಸ್ವರ್ಗ ಪ್ರಾಪ್ತಿಯಾಗುವಿಕೆ.
ಇನ್ನೂರ ಎಂಟನೆಯ ಅಧ್ಯಾಯವು
- ಕೋಸಲಕ್ಕೆ ಬಂದ ದಾಕ್ಷಿಣಾತ್ಯ ಬ್ರಾಹ್ಮಣನು ಮಾಡಿದ ವಿಷ್ಣುಸ್ತೋತ್ರ. ದಾಕ್ಷಿಣಾತ್ಯರು ವೈಕುಂಠಕ್ಕೆ ಹೋದುದು.
ಇನ್ನೂರ ಒಂಬತ್ತನೆಯ ಅಧ್ಯಾಯವು
- ಕಾಳಿಂದಿಯ ತೀರದ ಮಧುವನದಲ್ಲಿರುವ ವಿಶ್ರಾಂತಿ ತೀರ್ಥದ ಮಹಿಮೆಯು. ಕುಶಲವೆಂಬ ಬ್ರಾಹ್ಮಣನ ಬಹು ವ್ಯಭಿಚಾರಿಣಿಯಾದ ಆತನ ಪತ್ನಿಯ ಕಥೆ. ಆಕೆಯು ಸತ್ತಮೇಲೆ ಅನೇಕ ನರಕಗಳ್ನು ಅನುಭವಿಸಿ ಕೊನೆಯಲ್ಲಿ ಒಂದು ತರಹದ ನರಿಯಾಗಿ ಹುಟ್ಟುವುದು.
ಇನ್ನೂರ ಹತ್ತನೆಯ ಅಧ್ಯಾಯವು
- ಆ ನರಿಯನ್ನು ನೋಡಿದುದರಿಂದ ಅದರ ವಿಷಯದಲ್ಲಿ ಒಬ್ಬ ಮುನಿ ಪುತ್ರನಿಗೆ ಇದು ಪೂರ್ವ ಜನ್ಮದಲ್ಲಿ ನನ್ನ ತಾಯಿ ಆಗಿತ್ತೆಂಬ ಜ್ಞಾನವು ಬರುವುದು. ಅದಕ್ಕೆ ಆ ಜನ್ಮ ಹೋಗುವುದಕ್ಕೆ ತನ್ನ ತಂದೆಯ ಮಾತಿನಂತೆ ಅವನು ಮಧುವನದಲ್ಲಿ ಶ್ರಾದ್ಧವನ್ನು ಮಾಡುವುದು. ಅದರಿಂದ ಆ ತಾಯಿಗೂ ತಾನು ಶ್ರಾದ್ಧ ಮಾಡಿದವರಿಗೆಲ್ಲರಿಗೂ ಉತ್ತಮ ಲೋಕವು ಬರುವುದು. ಆ ಋಷಿಪುತ್ರನ ತಂದೆಯು ವಿಷ್ಣುವನ್ನು ಸ್ತುತಿಸಿ ಅವನ ಅನುಗ್ರಹದಿಂದ ಅವನ ಜೊತೆಯಲ್ಲಿ ವೈಕುಂಠಕ್ಕೆ ಹೋಗುವುದು.
ಇನ್ನೂರ ಹನ್ನೊಂದನೆಯ ಅಧ್ಯಾಯವು
- ಆ ಮುನಿಪುತ್ರನು ಹಾದರಗಿತ್ತಿಯ ಹೊಟ್ಟೆಯಲ್ಲಿ ಹುಟ್ಟಲು ಕಾರಣದ ವರ್ಣನೆ. ಪ್ರಸಂಗದಿಂದ ಚಂದ್ರನು ಗುರುವಿನ ಹೆಂಡತಿಯಲ್ಲಿ ರಮಿಸಿದುದರ ವರ್ಣನೆ.
ಇನ್ನೂರ ಹನ್ನೆರಡನೆಯ ಅಧ್ಯಾಯವು
- ಇಂದ್ರಪ್ರಸ್ಥದಲ್ಲಿರುವ ಬದರಿಯ ಮಹಿಮೆ. ಅದರಲ್ಲಿ ದೇವದಾಸನೆಂಬ ಬ್ರಾಹ್ಮಣನ ಕಥೆ.
ಇನ್ನೂರ ಹದಿಮೂರನೆಯ ಅಧ್ಯಾಯವು
- ಇಂದ್ರಪ್ರಸ್ಥದಲ್ಲಿರುವ ಹರಿದ್ವಾರದ ಮಹಿಮೆ. ಕಾಳಿಂಗನೆಂಬ ಬೇಡನ ಕಥೆ.
ಇನ್ನೂರ ಹದಿನಾಲ್ಕನೆಯ ಅಧ್ಯಾಯವು
- ಇಂದ್ರಪ್ರಸ್ಥದಲ್ಲಿರುವ ಪುಷ್ಕರ ತೀರ್ಥದ ಮಹಿಮೆ. ಪುಂಡರೀಕನ ಕಥೆ. ಪುಂಡರೀಕನ ಬಂಧುವಾದ ಭರತನು ಪುಷ್ಕರದ ಪ್ರಭಾವದಿಂದ ವಿಮಾನದಲ್ಲಿ ಸ್ವರ್ಗಕ್ಕೆ ಹೋಗುವುದು.
ಇನ್ನೂರ ಹದಿನೈದನೆಯ ಅಧ್ಯಾಯವು
- ಭರತ ಪುಂಡರೀಕರ ಸಂವದದಲ್ಲಿ ಭರತನು ತನ್ನ ಪೂರ್ವದ ಪುಣ್ಯವನ್ನು ಹೇಳುವುದು. ಭರತನು ಸ್ವರ್ಗಕ್ಕೆ ಹೋದುದು. ಪುಷ್ಕರ ಸ್ನಾನದ ಪ್ರಭಾವದಿಂದ ವಿಷ್ಣುವು ಪುಂಡರೀಕನ ಮನೆಯಲ್ಲಿ ಒಂದು ತಿಂಗಳವರೆಗಿರುವುದು. ಪುಂಡರೀಕನು ಸಾಯುಜ್ಯ ಮುಕ್ತಿಯನ್ನು ಹೊಂದುವುದು.
ಇನ್ನೂರ ಹದಿನಾರನೆಯ ಅಧ್ಯಾಯವು
- ಇಂದ್ರಪ್ರಸ್ಥದಲ್ಲಿರುವ ಪ್ರಯಾಗದ ಮಹಿಮೆಯು. ಅದರಲ್ಲಿದ್ದ ಮೋಹೀನೀ ಎಂಬ ವೇಶ್ಯೆಯ ಕಥೆ. ಮೋಹಿನಿಯು ಮರಣಕಾಲದಲ್ಲಿ ಪ್ರಯಾಗದ ನೀರನ್ನು ಕುಡಿದುದರಿಂದ ಮುಂದಿನ ಜನ್ಮದಲ್ಲಿ ದ್ರಾವಿಡ ದೇಶದಲ್ಲಿ ವೀರವರ್ಮನ ಹೆಂಡತಿಯಾಗಿ ಹುಟ್ಟುವುದು.
ಇನ್ನೂರ ಹದಿನೇಳನೆಯ ಅಧ್ಯಾಯವು
- ಈ ವೀರವರ್ಮನ ಹೆಂಡತಿಯು ಒಂದು ಸಾರಿ ತನ್ನ ಸಖಿಯ ಮನೆಯಲ್ಲಿದ್ದ ಪುಸ್ತುಕದಲ್ಲಿ ಭೂಗೋಳವನ್ನು ನೋಡಿ ಅದರಲ್ಲಿ ಇಂದ್ರಪ್ರಸ್ಥದ ಪ್ರಯಾಗವನ್ನು ನೋಡುವುದು. ಆಗ ಆಕೆಯು ಗಂಡನೊಡನೆ ಆ ಪ್ರಯಾಗಕ್ಕೆ ಹೋಗುವುದು. ವೀರವರ್ಮ ಅವನ ಹೆಂಡತಿಯರಿಬ್ಬರೂ ಹರಿಹರರನ್ನು ಸ್ತುತಿಸುವುದು. ವೀರವರ್ಮ ಮತ್ತು ಅವನ ಹೆಂಡತಿಯರು ಸತ್ಯಲೋಕಕ್ಕೆ ಹೋಗಿ ನಂತರ ವೈಕುಂಠಕ್ಕೆ ಹೋಗುವುದು.
ಇನ್ನೂರ ಹದಿನೆಂಟನೆಯ ಅಧ್ಯಾಯವು
- ಇಂದ್ರಪ್ರಸ್ಥದ ಕಾಶಿಯ ಮಹಿಮೆ. ಅದರಲ್ಲಿ ಒಂದು ಕಥೆ. ಇಂದ್ರಪ್ರಸ್ಥದ ಗೋಕರ್ಣದ ಮಹಿಮೆ. ಅದರಲ್ಲಿ ಜರೆ ಎಂಬ ಭಿಲ್ಲನ ಹೆಂಡತಿಯು ಆ ಗೋಕರ್ಣದಲ್ಲಿ ಸತ್ತುದರಿಂದ ಪಾರ್ವತಿಯ ಸಖಿಯಾಗುವುದು. ಇಂದ್ರಪ್ರಸ್ಥದ ಶಿವಕಾಂಚಿ ಮಹಿಮೆ. ಅಲ್ಲಿ ಶಿವನು ತಪಸ್ಸನ್ನು ಮಾಡಿ ವಿಷ್ಣುಭಕ್ತರಲ್ಲಿ ಮೊದಲನೆಯವನಾಗುವುದು. ಇಲ್ಲಿ ಬಾಣಾಸುರನು ತಪಸ್ಸು ಮಾಡಿ ಶಂಕರನ ಪ್ರಸಾದವನ್ನು ಹೊಂದುವುದು. ಹೇರಂಬ ಎಂಬ ಬ್ರಾಹ್ಮಣನ ಕಥೆ. ಇಂದ್ರಪ್ರಸ್ಥದಲ್ಲಿರುವ ತೀರ್ಥದ ಮಹಿಮೆ. ವಸಿಷ್ಠನೇ ಮುಂತಾದವರು ತಪಸ್ಸನ್ನು ಮಾಡಿ ಪುತ್ರರನ್ನು ಪಡೆಯುವುದು. ಇಂದ್ರಪ್ರಸ್ಥದ ದ್ವಾರಕೆಯಲ್ಲಿ ಯುಧಿಷ್ಠರನು ರಾಜಸೂಯಯಾಗವನ್ನು ಮಾಡುವುದು. ಭೀಮಕುಂಡದ ಮಹಿಮೆ. ಚೈತ್ರ ಶುಕ್ಲ ಚತುರ್ದಶಿಯ ದಿನ ಇಂದ್ರಪ್ರಸ್ಥವನ್ನು ಪ್ರದಕ್ಷಿಣೆ ಮಾಡಿದರೆ ಬರುವ ಫಲ.